Fohrradpröven op Pellworm

Schullerblick, Hand ruut, Foot op de Pedal, Hannen an’t Stüer un los geiht dat. Wat dat nich allens to bedenken gifft, wenn een sik op Rad sett, üm vun A na B to kamen. Dat hebbt ok de Schölers ut Klass 4 faststellt. Op de Stünnenplaan stunn an’n Mittwuch de Fahradpröven. De eerste Deel, also de Theoriepröven, hett Klass 4 al an letzten Friedag bestahn. Mit veel Freud un en Portschoon Opregen stunn all Schölers mit Rad un Helm torecht, as de Inselpolizist Herr Stephan un sien Kolleg vun’t Fastland Herr Remmer mit de Deenstwaag üm de Eck kemen. Dree Runden hebbt de Schölers hochkonzentreert de Prövstreck afföhrt. Dank de tolle Ünnerstütten vun de Öllern un de Övungsstünn in de Ünnerricht mit Herrn Stephan worrn an’t Enn 10 frischbedruckte Fahrradföhrerschiene överreicht. Jümmers en gode un sekere Fohrt an de Schölers ut de Löwenklass.

Anna Brodersen